-->
7jV8Go9rTqyfOqOLD0Rj3Gn1IrJt9wpFwJEk2sYv

Dek Iduk Susah Baru Ka Dapek Makan Rondang

foto pemanis tampilan 


SalingkaLuak.com, - Kutiko mambaco jo mandonga namo rondang viral kini takona maso saisuak. Samusim kanak kanak daulu. Kutiko itu masih basirowa singkek juo baru. Sakolah putiah sirah sarowa pendek.

Ado kalo maso itu siang manjalang luhua. Amak tibo jak dari porak manjinjiang kambia duo tali, ompek buah kambia karano di talian duo buah untuak mamudahan manjinjiang.

Tibo diuma lansuang dikubak dan dibolah lah kambia cako. Siap tu dipangua jo pangua indiak. Karano maso itu lun ado lai pangua kambia pakai masin listrik. Listrik sajo lun masuak lai. Uma kalau nak torang maso itu pakai lampu strongkeng. Nan multi fungsi. Panorangan di uma juo ka nyari ikan atau boluk ka sawah malam malam. Manyuluah bahaso kami e.

Baca Juga: Satpol PP Kota Padang Monitoring Tempat Hiburan Pasca PSBB

Kok ado masin pangua kambia kotu itu yo pakai masin robin. Kalua e maso barolek. Itu nan ka manaruah urang kayo dalam nagori pulo maso itunyo karano bolinyo maha.

Sadang mamangua kambia takona dek amak manyarayo wak ka lopou poi balanjo. Ang boli maco saparompek ka lopou lah nan amak ko awak katiko itu. Ka pambawua gulai ghe ha, kecek amak.

Sudah diboli maco lansuang di barosiahan di kutiah lah kapalo maco cako. Nan kambia lah ka dijadian santan lai. Tibo parintah kubak ubi duo urek. Duo urek ko baadiak adiak duo buak aratinyo. Lah sudah kambia cako jadi santan nan ubi lah sudah di concang ketek ketek.

Lansuang kuali godang naiak ka tunggu sakali. Masuak santan ka kuali jo sagalo bumbu gulai dek amak. Indak lupo ubi baconcang jo pucuak ubi sakalian jo maco. Sambia mananti masak diaduak aduak lah santan dalam kuali cako. Kok iyo kalau ndak di aduak ndak rato masaknyo do atau santan cako petai petai. Bitu nan amak manorangan.

Lah masak gulai cako ka untuak makan luhua jo makan malam manjalang poi ngaji ka surau.  Siap makan gulai nan tingga diangek angek an baliak supayo ndak rosan alias basi.

Lah bisuak siangnyo ka makan luhua lai pulang sikolah dicoliak samba didapua lah barubah. Lah bontuak kalio nampak gulai kapotang. Mungkin dek baangek angek an toruh agaknyo lah mamboku kuah gulai tu. Raso lah agak tambah lomak pado gulai biaso.

Dihari katigo ka makan luhua lah agak coklat anguh samba di kuali. Lah buek rondang amak kiro e. Nan awak dalam hati. Osah kamakan lomak sahari ko itu dalam pangona.

Sobab baa lah dek baitu makan rondang ko maso itu yo dirirayonyo. Rayo godang alias idul fitri rondang ayam. Rayo oji alias idul adha lai rondang dagiang karuban. Lain dsri itu ijan disobuk.

Baa lah dek baitu? Pitih sorik boreh maha, iduk susah. Apolai gaek bakuli mandeh kasawah. Banyak manjawek upah kojo maso itu.

Baliak karondang nan nampak dalam kuali didapua cako. Dikao manyonduak nasi sakali, ndaklai batanyo sia nan lah makan. Mah konai oriak. Kona urang nan lakang nan olun makan nan amak. Makosuk e adiak adiak jo abak kotu itu lun lei kiro e makan. Nan awak lah baguluk sajo makan dulu.

Mancoliak rondang ko lah tabayang batu batunyo (dagiang basayik sayik kenek kenek*). Lah digaruah garuah isi kuali nan basuo ubi concang, maco jo pucuak ubi nan lah mosiak dek angek. Tapi dek poruk litak ndak pikia bona lai basontuang sajo makan lai. Banyakan dodak rondangnyo.

Lah sampai malam bacarito lah abak jo amak baa dek buek rondang siang cako. Kiro e gulai nan duo ari nan lopeh nan lah jadi rondang karano baangek angek an toruh. Tu dek den banyak an kambia e kapotang bisa lamo tahan e bisa sapokan e kalian makan samba nan amak.

Taoniang jo mandonga kato liau lei maso itu. Sudah tu maningkah abak mangecek "mangko rajin rajin kalian sikolah bia jadi urang, jaan lei ajak kami ko juo kalian mancarian iduk bisuak. Cukuk lah kami ko sajo nan mangokeh dulu baru kalian makan"
Posan abak kotu itu.

Kini di kona kona baliak maso itu yo dek parosaian iduk mangko ka makan rondang. Nan urang kini dek malopehan salero makan rondang(*)
Related Posts

Related Posts

Posting Komentar